Pasaia itsasoa da. Itsas-kultura, itsas ondare bizia. Pasaia portua da, lantegiak eta langileak. Pasaia herriak dira, kaleak eta festak. Pasaia arrauna da.  Pasaia, izatez, herri askok osatzen duten herria da: Donibanek, Pasai San Pedrok, Trintxerpek eta Pasai Antxok. Itsasori begira, bere baitan biltzen du Oarsoaldearen historia, ia Euskal Herriarena ere izan litekeena: mundu zabalari lotua egonik, bertakoa zaintzen duena.

Pasaiak liluratu zuen Victor Hugo, Pasaitik irten zen Pedro Mari Otaño Ameriketara joateko eta Pasaiako Plazatik aritu zen Xenpelar ezkonberriei kantari.  Jaizkibeleko labarretatik, Ozeanoari so egiten dion kostaldea. Donibaneko kaletik, bateleren eta sukaldeko usain goxoaren zaporea duena. Trintxerpe urbano eta dinamikotik Pasai San Pedroko bizitzara, puntetatik Albaolara eta Pasai Antxoko langile bizitza eta festa kolore bizietara. Hori dena eta gehiago da Pasaia.