Lezo nortasuna da. Jaizkibeleko txoko zoragarrien pean, Pasaiko portuari begira eta Gaintxurizketaraino, Lezok Oarsoaldearen nortasuna biltzen du beregain. Santo Kristo Eliza da Euskal Herriko tenplu harrigarrienetako bat, bertan baitago munduko kristoren hiru irudi bizargabeetako bat. Kondairak dio itsasotik etorri zela. Egia ote da? Hori uste izan du, behintzat, Gipuzkoatik eta hainbat tokitatik erromes etorri izan diren hainbeste jendek!
Lezo kalea ere bada. Herrigunea bikain kontserbatutako jauregi eta etxe dotoreek osatzen dute, udaletxetik hasita, Erdi Aroko jatorrikoak batzuk eta garai modernokoak besteak. Herrigune bizia: herri giroa bikain mantentzen du, gaur ere, Lezok. Ezagunak dira bertako festak eta jai egunak eta, oro har, kaleko giro ederra. Edozein egunetan, kalean irekia den frontisean pilota partidu batez goza liteke, adibidez.
